ರಾಮದಾಸ್ - - ಅಡಿಗ ಪದ್ಯ : ಭೂಮಿಗೀತ

ರಾಮದಾಸ್ -- ಕೊಡುತ್ತೀರ , ಯಾರಾದರೂ ನನಗೆ ನನ್ನ ದೇವರನ್ನು ?

*ಕೊಡುತ್ತೀರ, ಯಾರಾದರೂ ನನಗೆ, ನನ್ನ ದೇವರನ್ನು ?
ಕೊಡುತ್ತೀರ, ಯಾರಾದರೂ ನನಗೆ, ನನ್ನ ದೇವರನ್ನು
ಕಳೆದುಕೊಂಡಿದ್ದೇನೆ, ಹೆತ್ತವಳು ನನ್ನ ಹೃದಯದಲ್ಲಿ ಬಿತ್ತಿದ್ದನ್ನು
ಬಾಲಿಶ ಕಲ್ಪನೆಗಳು ಹದವಾಗಿ ಉತ್ತಿದ್ದನ್ನು ?
ಹರಿಕಥೆ ಗೊಬ್ಬರವಾಗಿ, ದಾಸರ ಹಾಡು ಮಳೆಯ ಜೋಗುಳವಾಗಿ
ಅಲ್ಲಿ ಕಾಮನ ಬಿಲ್ಲು, ಇಲ್ಲಿ ಹುಣ್ಣಿಮೆ ಚಂದ್ರ, ಮುರಲೀನಾದ !
ಬಟಾನ ಬಯಲಿನೇಕಾಂತದಲ್ಲಿ ಗೋಪಾಲಬಾಲಸಖ್ಯ !
ಎಲ್ಲಿ..ಎಲ್ಲಿ..ಎಲ್ಲಿ ಹೋಯಿತು ಅವನ ಕೊಳಲ ಗಾನ ?
ಅಂದು ಪಂಚಕೋಶವ ತುಂಬಿ ಝೇಂಕರಿಸಿದ್ದು
ಅನ್ನವಾಗದೆ, ಬಟ್ಟೆಯಾಗದೆ, ನೀರು ನೆಳಲಾಗದೆ, ಕಡೆಗೆ
ಕಣ್ಣೊರೆಸುವ ಕೈಯೂ ಆಗದೆ.....ಏನೇನೂ ಆಗದೆ, ಆಗುತ್ತದೆಯೆ
ವರಾಹನ ದಾಡೆ, ಉಗುರು, ಪಾದ, ಕೊಡಲಿ, ಬಾಣ, ಚಕ್ರ ?

ಇಲ್ಲಿ ರಾವಣಸ್ಪರ್ಶಕ್ಕೆ ಮುರಿಯುತ್ತಾವೆ ಲಟಲಟನೆ ಶಿವನ ಬಿಲ್ಲು
ಪೂತನಿ ಹಾಲು ಸಮೃದ್ಧ ಸರಬರಾಜಾಗುತ್ತದೆ, ಮುಗ್ಧರಿಗೆ
ನೆಲ ನೀರು ಆಕಾಶಗಳಲ್ಲಿ ರಾರಾಜಿಸುತ್ತವೆ ಶಕಟಗಳು.

ಕೊಡುತ್ತೀರ, ಯಾರಾದರೂ ನನಗೆ, ನನ್ನ ಬಾಲ್ಯವನ್ನು ?
ಲಂಗೋಟಿ ಎಳೆದೋ, ಕೊರಳ ಪಟ್ಟಿ ಹಿಡಿದೋ
ಹೆಡೆಮುರಿ ಕಟ್ಟಿ ಬೆನ್ನಿಗೆರಡು ಗುದ್ದಿಯೋ ಕೇಳುತ್ತೇನೆ : ಯಾಕೋ ಕತ್ತೆ
ನಿನ್ನ ವಿನಾ ಇಲ್ಲಿ ಏನೇನೂ ಆಗುವುದಿಲ್ಲ ಅಂದೆಯಂತೆ, ಹೌದೆ ?
ಮಳೆ ಪ್ರವಾಹ ಕ್ಷಾಮ ಜ್ವಾಲಾಮುಖೀಸ್ಫೋಟ ಹಿಮಪಾತ ಬಿರುಗಾಳಿ ಬಿಟ್ಟರೂ
ಮಗನೆ, ಹೇಗೆ ಬಿಡಲೋ ನಾನು, ಚಾಕು ಚೂರಿ ಗುಂಡು ಆಟಂಬಾಂಬು, ಜಾತಿ
ಜಾತಿಗಳನ್ನ ?
ಧನಪಿಶಾಚಿಯ ಸಹಸ್ರಶೀರ್ಷ, ಸಹಸ್ರಬಾಹು-ಪಾದಗಳನ್ನ ?

ನನ್ನ ತಾಯಿ ಎಲ್ಲ ನದಿ ಸಮುದ್ರ ಸೇರುವ ಹಾಗೆ, ಸರ್ವಾಂತರ್ಯಾಮಿ
ನನ್ನೆದೆಯ ಸೇರುವ ಹಾಗೆ ಮಾಡಿದ್ದಳಯ್ಯ---ಕಳೆದುಕೊಂಡಿದ್ದೇನೆ.
ಏ ಸಾಧು, ಸಂನ್ಯಾಸಿ ಸ್ವಾಮೀಜಿ ಬೂದೀಬಾಬ ಮೌಲ್ವೀ ಪೋಪ್
ಕೊಡುತ್ತೀರ, ಯಾರಾದರೂ ನನಗೆ, ನನ್ನ ದೇವರನ್ನ
ಭಯವಿಲ್ಲದೆ ಬೆರಗಿಲ್ಲದೆ ಮುಚ್ಚುಮರೆಯಿಲ್ಲದೆ
ನನ್ನ ಕೈ ಹಿಡಿದು, ತಾನು ನಡೆದು
ನನ್ನನ್ನು ನಡೆಸುವವನನ್ನ ?

Like

Comment

Share

5Jyoti Ballal and 4 others

1 share

'ಮನುಷ್ಯ ಬದಲಾಗಬೇಕಾದರೆ ನಂಬಿಕೆಗಳನ್ನು ಪ್ರಶ್ನಿಸಬೇಕು' ತೋಳ್ಪಾಡಿ

'ಮನುಷ್ಯ ಬದಲಾಗಬೇಕಾದರೆ ನಂಬಿಕೆಗಳನ್ನು ಪ್ರಶ್ನಿಸಬೇಕು' | Vartha Bharati- ವಾರ್ತಾ ಭಾರತಿ

ಪ್ರೊ / ರಾಮದಾಸ್ ಅಭಿನಂದನೆ

ರಾಮದಾಸ್ ,   ramadas ,

ನಾರಾಯಣ . ಎಮ್. ಹೆಗಡೆ - ಉಡುಪಿಯಲ್ಲಿ ರಾಮದಾಸ ಅಭಿನಂದನೆ -26- 2-2017

ಫೆಬ್ರವರಿ 26ರಂದು ಉಡುಪಿಯಲ್ಲಿ ರಾಮದಾಸ ಅಭಿನಂದನೆ  | Udayavani - ಉದಯವಾಣಿ

ಪ್ರೊ/ ರಾಮದಾಸ್ ಅಭಿನಂದನೆ -26- 2-2017